რუსეთის სამხედრო ძალებმა უპილოტო საფრენი აპარატებით და რაკეტებით მორიგი იერიში მიიტანეს უკრაინის ხარკოვის და ნიკოლაევის ოლქებზე. უკრაინის საჰაერო ძალების სარდლის, მიკოლა ოლეშჩუკის მიერ დღეს, 26 მარტს, დილით გამოქვეყნებული მონაცემებით, გასული ღამის განმავლობაში მოწინააღმდეგემ უკრაინას ყირიმიდან და კურსკის ოლქიდან შეუტია 12 დრონით, ხოლო დონეცკის მიმართულებიდან - 2 საზენიტო რაკეტით. გენერალ-ლეიტენანტ ოლეშჩუკის თანახმად, უკრაინის თავდაცვის ძალებმა 12-ვე დრონი ჩამოაგდეს. უკრაინის ხელისუფლება ხმელეთზე გამოწვეული შედეგების შესახებ ჯერჯერობით არაფერს იუწყება. ასევე ნახეთ უკრაინა აცხადებს, რომ „კრიტიკულად" დააზიანეს რუსული სადესანტო გემი „იამალი“ რუსეთის ხელისუფლებამ დილით განაცხადა, რომ უკრაინის მხრიდან მორიგი შეტევა იყო ბელგოროდის ოლქზე. თავდაცვის სამინისტროს ინფორმაციით, საჰაერო თავდაცვის საშუალებებით გაანადგურეს ზალპური ცეცხლის რეაქტიული სისტემა „გრადის“ 2 და ასეთივე სისტემა „ვამპირის“ 13 ჭურვი. რუსეთის საგანგებო სიტუაციების სამინისტროს ცნობით, ბელგოროდის ოლქში დაიცხრილა ერთ-ერთი რაიონის სახანძრო-სამაშველო სამსახურის შენობა, სადაც 2 მეხანძრე დაიჭრა. საომარი მოქმედებების პირობებში მხარეთა მიერ გავრცელებული ცნობების დამოუკიდებელი წყაროებით გადამოწმება გართულებულია. ...