ფსბ-ს ხელმძღვანელმა ალექსანდრ ბორტნიკოვმა სამშაბათს განაცხადა, რომ თითქოს უკრაინის სპეცსამსახურებმა ხელი შეუწყვეს 22 მარტს მოსკოვის ოლქში „კროკუს სიტი ჰოლის“ საკონცერტო დარბაზში მომხდარ ტერაქტს, რომელსაც, უკანასკნელი მონაცემებით, 139 ადამიანი ემსხვერპლა. სამშაბათს მოსკოვში გამოსვლისას ბორტნიკოვმა აღიარა, რომ რუსეთის გამომძიებლებს ჯერ არ დაუდგენიათ თავდასხმის დამკვეთი, მისი შემსრულებლები კი, მისი თქმით, იყვნენ რადიკალი ისლამისტები. მიუხედავად ამისა, მისი სიტყვებით, ის დარწმუნებულია, რომ ტერაქტთან დაკავშირებული არიან უკრაინის სპეცსამსახურები. სიტყვასიტყვით მან ისაუბრა კიევის „ანგაჟირებულობის“ შესახებ. ასევე ნახეთ პუტინმა “კროკუსში“ მომხდარი თავდასხმა მტკიცებულების გარეშე კვლავ უკრაინას დაუკავშირა ბორტნიკოვმა მტკიცებულებად მოიყვანა ის, რომ ტერაქტში ეჭვმიტანილები, რომლებიც მიმალვას ცდილობდნენ, ავტომანქანით მიემგზავრებოდნენ უკრაინისკენ. მან აგრეთვე თქვა, რომ უკრაინა თითქოს „ტერორისტების მომზადებას ახორციელებდა ახლო აღმოსავლეთის ტერიტორიაზე“. ის ასევე გამოვიდა მოწოდებით, უკრაინის უსაფრთხოების სამსახური ტერორისტულ ორგანიზაციად იქნეს მიჩნეული. შეკითხვაზე, არის თუ არა „კანონიერი სამიზნე“ უკრაინის სხვა სპეცსამსახურის, უკრაინის შეიარაღებული ძალების მთავარი სადაზვერვო სამმართველოს ხელმძღვანელი, კირილო ბუდანოვი, ფსბ-ს დირექტორმა თქვა, რომ ყველა, ვინც დანაშაულს სჩადის „რუსეთისა და რუსეთის მოქალაქეთა“ წინააღმდეგ, კანონიერი სამიზნეა. შეკითხვაზე, „რატომ არიან ისინი ჯერ კიდევ ცოცხლები“, მან თქვა: „ყველაფერი წინაა“. ადრე რუსეთის უშიშროების საბჭოს მდივანმა ნიკოლაი პატრუშევმა ჟურნალისტების შეკითხვას, ვინ იდგა ტერაქტის უკან - უკრაინა თუ ტერორისტული დაჯგუფება „ისლამური სახელმწიფო“, უპასუხა: „რა თქმა უნდა, უკრაინა“. ასევე ნახეთ ეფესბე “ჩაფლავდა” და მოსკოვის ტერაქტში ბრალდებულებს საჩვენებლად აწამებს უკრაინის ხელისუფლება კატეგორიულად უარყოფს ტერაქტთან კავშირს. მისი წარმომადგენლები აცხადებენ, რომ მოსკოვი ცდილობს უკრაინა დაადანაშაულოს, რათა გაამართლოს მის წინააღმდეგ ომი. აშშ-მა და დასავლეთის სხვა სახელმწიფოებმა განცხადებები გააკეთეს იმის თაობაზე, რომ არ არსებობს ტერაქტთან უკრაინის რაიმე კავშირის დამადასტურებელი საბუთი და რომ არ არის საფუძველი ეჭვისთვის, რომ ის „ისლამური სახელმწიფოს“ ავღანეთის ფილიალმა შეასრულა. ბორტნიკოვმა აღიარა, რომ აშშ-მა რუსეთს გადასცა ინფორმაცია ტერაქტის მზადების შესახებ, მაგრამ, მისი სიტყვებით, ეს ინფორმაცია „ზოგადი ხასიათის იყო“. მან ასევე თავდასხმასთან კავშირში დასდო ბრალი დასავლეთის სპეცსამსახურებს და თქვა, რომ „მათი მიზანია რუსეთის საზოგადოებაში პანიკის დათესვა“. ბორტნიკოვს წამოსცდა, რომ თავდასხმასთან მათი კავშირის თაო...